လူ့ဘဝကို ဖြတ်ကျော်တဲ့နေရာမှာ လူတွေဟာ ကိုယ်စီ ကိုယ်ခံအားနဲ့ ဖြတ်သန်းရတယ် သမီး။ 

ဘဝဟာ ဒုက္ခဘုံကြီးပဲ ဆင်းရဲမှာပေါ့ ဆိုတဲ့သဘောကို လက်ကိုင်ထားပြီး ဒုက္ခသုက္ခကို ရင်ဆိုင်တဲ့သူတွေ ဖေဖေ မြင်ဖူးတယ်။ ဘဝက တိုတယ်။ ပျော်သလို နေကြ ၊ စုံနေအောင် ခံစားကြဆိုတဲ့ အယူအဆကိုလည်း ဖေဖေ ကြားဖူးတယ်။ ဒီအယူအဆတွေက ဘဝအတွေ့အကြုံထဲက လာတာ ရှိသလို ဘာသာရေးဆိုင်ရာ သင်ကြားမှု ၊ ပတ်ဝန်းကျင်ဩဇာရဲ့ သက်ရောက်မှုတွေလည်း လာတာ ရှိပါတယ်။ 

ဘာပဲဖြစ်ဖြစ် ဘဝကို ဖြတ်ကျော်တဲ့နေရာမှာ စိတ်နေသဘောထားတွေဟာ ဖောင်တွေပါပဲ။ ကောင်းမွန်ခိုင်ကျည်တဲ့ စိတ်ထားတွေနဲ့ ဘဝကို ဖြတ်ကျော်ရတာ တန်တယ်။ လှေကောင်းရွက်ကောင်းနဲ့ ပင်လယ်ချောင်းမြောင်းတွေကို ဖြတ်သန်းရသလိုပေါ့။ စိတ်ချမှုနဲ့ ကျေနပ်ဖွယ်အတိ ဖြစ်မယ်။ ခံယူချက်အလွဲတွေနဲ့ ဘဝပြဿနာတွေကို ရင်ဆိုင်ရပြီဆိုရင်တော့ မဆုံးတဲ့အရှုပ်တွေ ၊ နောင်တပူဆွေးမှု နဲ့ ဆင်းရဲတွေသာ ကြုံတွေ့ရမှာပဲ သမီး။

နောက်နှစ်နည်းနည်းမှာ သမီးဟာ လူ့ဘဝကို ဒီထက်ပို မြင့်မြင့်မြင်လာလိမ့်မယ်။ သမီး မြင်လာမယ့် လောကဟာ ပျော်စရာကောင်းမလား ၊ ထိုက်တန်ရဲ့လားဆိုတာ ဖေဖေ မပြောနိုင်ဘူး။ သမီး ကြုံမယ့် ကမ္ဘာကြီးဟာ ရက်စက်တဲ့ ကမ္ဘာကြီးလား ၊ အချင်းချင်း စောင့်ရှောက်ဖေးကူတဲ့ ဗြဟ္မစိုရ်ဘုံကမ္ဘာကြီးလား ဖေဖေ မသိပါဘူး။ အဖေတစ်ယောက်အနေနဲ့ သမီးကို ကိုယ်ခံအားကောင်းကောင်းနဲ့ လောကထဲ ရဲရဲလျှောက်ဝင် ပျော်ရွှင်စေချင်တဲ့ ဆန္ဒတော့ ဖေဖေ့မှာ အပြည့်ရှိပါတယ်။ 

ဒီနေ့အဖို့ ဒီအတွေးနဲ့ပဲ သမီးကို ဖေဖေ လက်ဆောင်တစ်ခု ပေးချင်ပါတယ်။ သမီးဘဝ ပျော်ရွှင်ဖို့ လက်ကိုင်ထားသင့်တဲ့ အယူအဆတစ်ခုပေါ့။ သမီးကို ကောင်းမွန်တဲ့ဘဝတစ်ခု ၊ ထိုက်တန်တဲ့ နေနိုင်ခြင်းနဲ့ ဖြတ်ကျော်အောင် ကူညီပေးမယ့် ကိုယ်ခံအားမြှင့် ဒဿနတစ်ခုအကြောင်းပေါ့။ ဒီနှစ်တွေမှာ ဖေဖေ နှစ်ခြိုက်လို့ ကြိုးစားလိုက်နာနေတဲ့ principle တချို့ပေါ့။ 

အဲ့ဒါကတော့ Stoicism ဆိုတဲ့ ဂရိဒဿနထဲက သင်ကြားချက်တချို့အကြောင်းပါ။ ကိုယ့်ကိုယ်ကိုယ် ထိန်းချုပ်မှု ၊ ဆင်ခြင်တုံတရားနဲ့ ကိုယ်ကျင့်တရားနဲ့အညီ နေထိုင်မှုတွေအကြောင်း သင်ကြားတဲ့ နေ့စဉ်သုံး ဒဿနတစ်ခုအကြောင်းပါပဲ။ Stoicism ဟာ ဘီစီ ၃၀၄ တစ်ဝိုက်က စပြီး ပေါ်ပေါက်လာတဲ့ ထောင်စုနှစ်ချီ အယူအဆတစ်ခု ဖြစ်ပြီး ဒီနေ့အထိလည်း ဘုရင်ဧကရာဇ်ကနေ ဆင်းရဲသားအထိ ဘယ်သူမဆို ကျင့်သုံးလိုက်နာနိုင်တဲ့ ၊ ကျင့်သုံးလိုက်နာနေတဲ့ ကျော်ကြားတဲ့ လူမှုဒဿနတစ်ခု ဖြစ်လို့ လူတိုင်းနဲ့ အကျုံးဝင်တယ်လို့ ဖေဖေထင်တယ်။ 

ပျော်ရွှင်စွာ ရှင်သန်နေထိုင်နိုင်ဖို့ Stoic တစ်ယောက် လိုက်နာတဲ့ စည်းမျဉ်းကို တိုတိုပဲ ပြောပါရစေ။ နောင်များမှာ သမီးဘာသာ ချဲ့ထွင်လေ့လာသွားဖို့လည်း တိုက်တွန်းပါတယ်။ 

(၁) မကြောက်နဲ့

ဘဝမှာ ကောင်းတာရော ဆိုးတာပါ ဖြစ်နိုင်တယ် သမီး။ ဘဝဆိုတဲ့ အစဉ်တန်းကြီးက မရေရာမှုတွေနဲ့ပဲ ပြည့်နေတာပါ။ သေချာမှုက တစ်ခုပဲ ရှိတယ်။ အားလုံး တစ်ချိန်မှာ လူ့ဘဝက ထွက်ခွာရမယ် ဆိုတာပါ။ 

ရှင်သန်မှု အခိုက်အတန့်တိုင်းအတွက်လည်း အာမခံချက်မရှိပါဘူး။ ဒီလို တွေးတော့လည်း ကြောက်စရာလို့ ထင်သွားလိမ့်မယ်။ ဒါပေမယ့်သမီး ။ ထိတ်လန့်မှုနဲ့ နေထိုင်သွားသမျှ တစ်စက္ကန့်တိုင်းဟာ သေဆုံးသွားတဲ့ အချိန်တွေပဲ။ တကယ့်ရှင်သန်မှုဆိုတာ ဖေဖေတို့ရဲ့ တစ်နေ့တာကို အကြောက်တရားမဲ့စွာ ၊ စိတ်ခွန်အားရှိစွာ ဖြတ်ကျော်မှသာ ရနိုင်မယ်။ 

သမီး အမြဲ လုပ်ချင်ခဲ့တဲ့ အရာတစ်ခုခု ရှိမယ်။ မအောင်မြင်မှာစိုးလို့ နောက်ဆုတ်သိမ်းဆည်းထားတဲ့ အိပ်မက်တွေ ရှိကောင်းရှိမယ်။ ရဲရဲသာ လုပ် သမီး။ သမီးအလွန်ဆုံး ကြုံရမှာက မအောင်မြင်တာပဲ။ ရှုံးသွားတယ်ဆိုတာ မရှိဘူး။ သမီးမှာ ကိုယ့်ဘဝကိုယ် ပိုင်တယ်ဆိုတဲ့ ခံစားချက်နဲ့ အိပ်မက်တွေနောက် လိုက်ခဲ့လို့ ကျေနပ်တယ်ဆိုတဲ့ ခံယူချက်ရှိသွားရင် သမီးဖြတ်သန်းခဲ့တာ အောင်မြင်ပျော်ရွှင်တဲ့ ဘဝပါပဲ။

(၂) ကိုယ်မထိန်းချုပ်နိုင်တဲ့ကိစ္စ မခံစားနဲ့

ဘာပဲဖြစ်လာဖြစ်လာ သမီး ထိန်းချုပ်လို့ ရတာနဲ့ ထိန်းချုပ်လို့ မရတာ ဒီနှစ်ခုထဲက တစ်ခုပဲ ရှိမယ်။ သမီးလုပ်ရမှာက ကိုယ်ထိန်းချုပ်နိုင်တဲ့အပိုင်းကို အကောင်းဆုံး ၊ အသားနားဆုံး ဖန်တီးတည်ဆောက်သွားဖို့ပဲ။ သမီး အာရုံစိုက်ရမှာက သမီးရဲ့ အတွေး ၊ သမီးရဲ့ လုပ်ရပ်နဲ့ ကံဆိုးမိုးမှောင်ကျမှုကို ဉာဏ်ရှိရှိ ဘယ်လိုတုန့်ပြန်မလဲဆိုတဲ့ ဆင်ခြင်မှုပဲ။ 

Stoic တွေကို အပြင်လူတွေက ခံစားချက်မရှိတဲ့သူတွေလို့ ထင်ကြတယ်။ တကယ်က Stoic တွေဟာ ဘဝပြဿနာတွေကို ရှင်းရှင်းပြတ်ပြတ်မြင်ပြီး လက်ရှိအချိန် လက်ရှိအခြေအနေအတွက် ကိုယ်လုပ်နိုင်သမျှကို လက်တွေ့ကျကျ အကောင်းဆုံး ပိုင်းခြားလုပ်တတ်ကြသူတွေပါ။ ဒါကြောင့်ပဲ သူတို့ဟာ ခံစားလွယ်ပြီး ယိုင်နဲ့လဲပြိုမသွားဘဲ လောကဓံကို ကြံ့ကြံ့ခံနိုင်စွမ်း မြင့်တာပေါ့။ 

သမီးဘဝမှာ ကိုယ်မထိန်းချုပ်နိုင်တဲ့ အခြေအနေတွေ အများကြီး ကြုံလာမယ်။ ဒီလို ကစဉ့်ကလျားအခြေအနေတွေထဲကမှ ကိုယ်ထိန်းချုပ်နိုင်တဲ့အပိုင်းကို အကောင်းဆုံး ထိန်းချုပ်မောင်းနှင်ပါ။ ကိုယ်ထိန်းချုပ်နိုင်တဲ့အပိုင်းကိုပဲ အာရုံပြုထားတဲ့သူက Emotional အဖြစ်နည်းတယ်။ ဝမ်းနည်းဖွယ်ရာအခြေအနေတွေရဲ့ လောင်မြှိုက်မှုကြောင့် ကျွမ်းလောင်မသွားဘူး။ အစကတည်းက Stoic တစ်ယောက်ဟာ အဆိုးဆုံးအခြေအနေတွေကို မျှော်လင့်ပြီး သူလုပ်နိုင်တာ အကောင်းဆုံးလုပ်ဖို့ ပြင်ဆင်ထားလို့ပဲ။

ပျော်ရွှင်မှု နဲ့ မျှော်လင့်ချက်ဟာ တခြားသူတစ်ယောက်က လာပေးမှ ရတဲ့ လက်ဆောင်မဟုတ်ဘူး သမီး။ ကိုယ့်ဘာသာ ဖန်တီးယူပါ။

(၃) ကိုယ့်ဥပဒေနဲ့ကိုယ် နေပါ

လူ့လောကမှာ လူတွေ လိုက်နာဖို့ ချမှတ်ထားတဲ့ စည်းမျဉ်းစည်းကမ်းတွေ ၊ ဥပဒေ ထုံးတမ်းတွေ ရှိတယ်။ သမီး ကြိုက်သည်ဖြစ်စေ မကြိုက်သည်ဖြစ်စေ ဒါတွေ လိုက်နာရလိမ့်မယ်။ ဒီထက် ပိုအရေးကြီးတယ်လို့ ဖေဖေ ယူဆတာ ရှိတယ် သမီး။ အဲ့ဒါက သမီးအတွက်လည်း သမီးကိုယ်တိုင် ရေးဆွဲထားတဲ့ ကိုယ်ကျင့်ဥပဒေ ၊ စံနှုန်းတွေ ရှိဖို့ပဲ။

ကိုယ့်ဥပဒေက ကိုယ့်ရဲ့ ဘဝကို ကိုယ်ဘယ်လို ဖြတ်ကျော်ချင်လဲ ၊ ကိုယ်မလုပ်ချင်တဲ့ ဘယ်တော့မှ မချိုးဖောက်မယ့် စံက ဘာတွေလဲလို့ စည်းဘောင်သတ်လိုက်တဲ့ Personalized Rules တွေပါ။ ဥပမာ - သမီးအတွက် ရိုးသားခြင်းက စံဥပဒေဆို ကိုယ့်ကိုယ်ကိုယ်ရော သူများကိုပါ လိမ်လည်လှည့်ဖျားတဲ့အလုပ် မလုပ်မိအောင် စောင့်ရှောက်ရမယ်။ 

လူဟာ ကိုယ့်ဥပဒေကို ကိုယ်လိုက်နာရင်ကိုပဲ ဘဝမှာ တော်တော်ကြီး ဟုတ်နေပြီလို့ ပြောနိုင်တယ်။ ကိုယ့်ဥပဒေကလည်း ဘယ်စံနဲ့ချိန်ချိန် ဖြောင့်မတ်မှန်ကန် ကောင်းမွန်နေရင်တော့ အတိုင်းထက်အလွန်ပေါ့ သမီး။ သမီးဘဝရဲ့ စံတန်ဖိုးနဲ့ သမီးကိုယ်တိုင် လေးစားလိုက်နာမယ့် ဥပဒေကို ရှာတွေ့နိုင်ပါစေ။

Stoicism မှာ ပြောစရာတွေမှ အများကြီး။ လိုက်နာကျင့်သုံးစရာ ကောင်းမြတ်တဲ့ ညွှန်ကြားချက်တွေမှ အများကြီးပဲ သမီး။ ပျော်ရွှင်ထိုက်တန်တဲ့ဘဝ ရဖို့ Stoic ဒဿနတွေကနေ သင်ယူစရာတွေ အများကြီး ရှိသေးတယ်။ ဒီနေ့တော့ ဒီလောက်ပဲပေါ့ သမီး။