ဆောင်းရောက်ရင်
ဆောင်းရောက်ရင်
ဂျင်းဘောင်းဘီအိတ်နှစ်ဘက်မှာ
လက်ထည့်ပြီး လမ်းလျှောက်ထွက်မယ်။
ဆောင်းရောက်ရင်
ပွဲတော်ဈေး ပတ်
ရဟတ်စီးသူတွေ ကြည့်မယ်
နှင်းဖွေးတဲ့ မြေပြင်မှာ ရပ်
ဆောင်းဖွဲ့တေး
မှုန်ရီရီ ကမ်းပါးမှတစ်ဆင့်
မြဆန်တဲ့ မြစ်ဟာ
မြို့ကလေးကို နမ်းထိသွားပေါ့
ကြယ်မွှားမွှား လူးထားတဲ့ညမှာ
ဆောင်းဟာ
အိမ်သစ်ပြောင်းသွားခဲ့
အသိုက်မှာပဲ
ခုံခုံမင်မင် မြုံချင်နေတဲ့ ငှက်ပါ
ရာသီကို ဆန်တက်ခဲ့ရ
ဆောင်းညတွေကို မေ့မရခဲ့ဘူး ။ ။
ပြတင်းပေါက်
ကျွန်တော့်ပြတင်းပေါက်မှာ
ပုံရိပ်လွှာတွေ အကွက်ပြောင်း,က
သက်ပြင်းချသံတွေ ကြားနေရတယ်။
ရာသီကူးတတ်တဲ့ ဇာတ်လမ်းတွေ
အခွံချင်း လဲလှယ်တဲ့အခါ
ငါ,ငါဆိုတဲ့ အစွဲတွေကို လျှော်ဖွပ်ဖို့
ဘယ်လိုချွတ်ဆေးသုံးရပါ့။